Dili, 18 Janeiru 2022 – Negosiante Mario Amaral ne’ebé fa’an kioske iha Fomentu II, Komoro, Dili, hateten katak foinsa’e balu ne’ebé baibain sosa beibeik tabaku masu tomak ne’e ida agora sosa de’it tabaku rahun $0.25 ka $0.50 ho razaun tanba kbiit la to’o ona atu sosa masu tomak ida kada loron.

“Ita-nia labarik joven sira be baibain mai borong masu de’it ne’e agora balu mai sosa rahun de’it ona, $0.25, $0.50, dehan tanba sira-nia osan araska ona,” Mario informa ba Timor News, ohin (18/01), iha Fomentu II.

Iha loron ne’ebé hanesan, negosiante Judit da Silva Borromeu ne’ebé fila-liman ho fa’an sasán iha Bekora, Dili, mós informa katak joven barak mak halo protestu tanba sira hanoin katak negosiante sira mak hakarak hasa’e rasik tabaku nia folin, nune’e susar atu sira fuma ho estável loro-loron.

“Sira sosa de’it kuarter ($0.25), funsionáriu sira mai sosa nafatin masu tomak. Ema joven sira balu dehan sira lakohi ona fuma,” Judit akresenta.

Nafatin iha loron ne’ebé hanesan, Timor News entrevista hikas Inspetór Jerál AIFAESA, Ernesto Monteiro, iha ninia knaar-fatin, Dili, no nia rekomenda ba joven sira katak osan laiha ona di’ak liu para ona fuma.

“Sé sente osan laiha ona lalika konsumu tabaku, konsumu fali buat seluk ne’ebé di’ak liu,” nia dehan.