Manufahi, 29 Setembru 2023 - Embaixadór Novazelándia iha Timor-Leste, Philip Hewiit, hateten katak governu Novazelándia liuhosi World Fish iha kompromisu hodi apoiu grupu akuakultura (hakiak ikan) sira iha Timor-Leste (TL), atu hasa'e produsaun ikan iha rai laran hodi fornese ba iha programa merenda eskolár ninian, nune'e bele hadi'ak labarik Timoroan sira-nia nutrisaun. Philip hato'o lia hirak ne'e bainhira hamutuk ho Ministru Agrikultura Pekuária Peska no Floresta (MAPPF), Marcos da Cruz, autoridade munisípiu Manufahi iha Sesta ne'e (29/09) inaugura sentru fini ikan nila iha aldeia Kolokau, suku Umaberloik, postu administrativu Alas, munisípiu Manufahi.

Philip Hewiit hateten tan katak sira mós hakarak apoiu grupu akuakultura sira ne'e hodi mantein grupu nia sustentabilidade, atu hasa'e liután produsaun ikan iha rai laran, nune'e bele hadi'ak rendimentu ekonómia familía nian, inklui redús importasaun ikan iha futuru. Sentru fini ikan Kolokau hahú estabelese iha tinan 2022 liuhosi kooperasaun servisu entre kompaña ho naran Same Construction ho Word Fish hodi hakiak ikan nila. Durante ne'e sentru refere distribui tiha ona fini ikan hamutuk rihun 65 ba munisípiu sira hanesan Ainaru, Manatutu, Vikeke, inklui Manufahi.