Dili, 08 Jullu 2021 – Núnsiu Apostóliku Munseñor Marco Sprizzi agradese ba estrutura tomak Ministériu Interiór (MI) nian tanba konkorda hodi fó vistu ho longu prazu ba misionáriu sira hosi Santa Sé ne’ebé hala’o sira-nia misaun ba Igreja Katólika iha Timor-Leste.
Munseñor Marco Sprizzi hato’o agradesimentu ne’e wainhira ho Vigáriu Leandro Maria Alves no Diretór Jerál Servisu Migrasaun Superintendente Luis Soares Barreto hasoru malu ho Vise Ministru Interiór Antonio Armindo ohin (08/7) iha Dili, hodi ko’alia kona-ba akordu ba vistu refere no mudansa Lei Migrasaun nian.
“Ami hakarak agradese ba Vise Ministru Interiór ho estrutura tomak ne’ebé konsidera ami-nia akordu ne’ebé konkorda fó vistu ho longu prazu ba misionáriu sira atu bele hela iha Timór hodi hala’o servisu Misionáriu nian hodi tulun kreda no sarani timoroan hotu iha nasaun Timor-Leste,” dehan Marco Sprizzi hafoin remata enkontru.
Nia mós aproveita okaziaun ida ne’e hodi hato’o kumprimentus hosi Papa Francisco ba sarani sira iha Timor-Leste.
Fonte: Mídia Serviço Relações Públicas de Ministério do Interior