PM XANANA ARANKA BA JAKARTA HODI PARTISIPA ENKONTRU NIVEL ALTU ASEAN BA DALA-43
Dili, 03 Setembru 2023 – Primeiru Ministru, Kay Rala Xanana Gusmão, Domingu ohin (03/09/) hala’o vizita ofisiál dahuluk ba Jakarta, hafoin simu pose iha loron ida fulan Juñu tinan 2023, hodi reprezenta Timor-Leste hamutuk ho xefe estadu no xefe governu hosi nasaun hamutuk ruanulu-resin-neen (26) hodi partisipa iha enkontru nível altu Asosiasaun Nasaun Sudeste Aziátiku (ASEAN, sigla inglés) nian ba dala haatnulu-resin-tolu (43) iha Jakarta, Indonézia, ne’ebé sei hala’o iha loron lima to’o hitu fulan Setembru tinan 2023.
Timor-Leste nia Prezensa iha enkontru ne’e, sai nu’udar observadór hodi rona no aprende esperiénsia hosi lideransa ASEAN sira, hodi hein ajenda Timor-Leste sai membru iha tinan 2024.
Nune’e iha Jakarta, PM Xanana sei partisipa mós iha simeira kona-ba negósiu no investimentu ba ASEAN (Business and Investment Summit ASEAN) 2023 nian, ne’ebé oradór sira sei partisipa hosi lideransa no setór privadu ASEAN nian, no sei lansa hosi Ministru Investimentu Repúblika Indonézia, Zulkifli Hasan, no Sekretáriu Jerál ASEAN, Kao Kim Hourn.
Fonte: Mídia Gabinete do Primeiro-Ministro (GPM)
