Dili, 15 Jullu 2021 – Organizasaun Mundiál ba Saúde (OMS) fó xamada atensaun katak mistura tipu vasina kontra Covid-19 ne’ebé diferente ba ema ida iha doze dahuluk no daruak ne’e perigozu.
BBC News haktuir, Xefe Peskiza OMS Soumaya Swaminathan hateten liuhosi konferénsia imprensa ne’ebé hala’o iha kuarta (13/7) ne’e katak, nasaun balu nia tendénsia atu kahur ka mistura tipu vasina Covid-19 ne’ebé diferente ne’e perigozu tanba seidauk iha estudu kle’an no evidénsia forte ba nia efisiénsia.
“Ne’e duni ida ne’e nu’udar tendénsia perigozu ida […] ida ne’e nia evidénsia no dadus (efisiénsia) limitadu,” dehan Swaminathan.
Nia akresenta katak tendénsia ida ne’e bele hamosu mós dúvida iha populasaun sira-nia hanoin kona-ba atu hili tipu vasina saida loos tuir mai iha doze daruak, datoluk ka to’o dahaat.
Enkuantu nasaun sira ne’ebé mak planeia atu mistura vasina kontra Covid-19 diferente iha programa vasinasaun mak hanesan, Kanadá, Tailándia, Korea Súl, Rúsia, Vietname, Indonézia no seluk tán.
Fonte: BBC News