Kopa Mundiál Katar, 24 Novembru 2022 - Selesionadór Gana, Otto Addo, hafoin remata jogu entre Portugál no Gana ne’ebé ho rezultadu 3 - 2, iha ninia entrevista hateten ba jornalista sira katak Ronaldo hetan prezente espesiál ida hosi arbitru Ismail Elfath.

“Se ema ida marka golu, parabéns, maibé iha realidade ne’e nu’udar prezente espesiál ida hosi arbitru”, dehan Otto, hodi refere ba Ronaldo ne’ebé marka golu dahuluk iha vitória Portugál nian.

Otto esplika liu tán katak sira joga di’ak no pasa bola mós ho di’ak, nune’e konsege marka tiha golu rua hodi kuaze halo empata, maibé sorte mak ladun iha.

"Ami mak joga defensivu, nune’e lakonsege ataka hodi kria oportunidade golu nian halo barak. Ami komete erru ba golu daruak no datoluk, maibé sorte mak ladun iha", Otto esplika.

Otto mós rekoñese kartaun kinur ba ninia jogadór sira, maibé nafatin keixa katak sira tuir lolos konsege pontu ruma hosi joga refere, maibé arbitru mak la ajuda.