Oekusi, 17 Novembru 2021- Prezidente Autoridade (PA) Rejiaun Administrativu Espesiál Oekusi Ambenu (RAEOA), Arsénio Paixão Bano, akompaña hosi ekipa no tékniku sira, iha kuarta (17/11) ne’e, lansa fatuk dahuluk ba projetu dada eletrisidade ba iha bairu 5 iha suku Usitakeno no Usitasae, Sub-rejionál Oe-silo, Oekusi.
Projetu refere sei benefísia komunidade bairu Tua Penu, Oenoah, Oel Nitas no Katu’i iha suku Usitakeno no bairu Nakome iha suku Usitasae ne’ebé ho totál uma-kain 167 no populasaun 570.
Iha lansamentu refere PA RAEOA hateten katak, sira sente kontente tanba fatin refere sai ona hosi nakukun ba naroman tanba fatin Oel Nitas no Katu’i, Nakome sai fatin importante ba RAEOA, nune’e autoridade lakohi bairu tolu ne’e sei iha nakukun laran.
Iha fatin hanesan, xefe suku Usitaqueno iha ninia intervensaun hateten katak, sira sente kontente ho prezensa ba PA RAEOA hamutuk ho membru autoridade sira tanba bele vizita sira-nia fatin izoladu ne’ebé dezde tempu okupasaun Portugés no Indonézia to’o ukun-an tinan barak ona maibé seidauk asesu ba eletrisidade.
Projetu refere konstrui hosi kompañia Am-Lichoe Unipessoál. Lda., ho traballadór 17 no durasaun servisu fulan 4.
Fonte: ZEESM Timor-Leste