Dili, 15 Marsu 2022 – Relasiona ho tempu Kuarezma ida ne’e Padre Bento Barros Pereira hato’o Santo Padre Francisco nia mensajen ba sarani sira hotu ne’ebé hateten katak sarani sira labele kole atu halo di’ak barak hahú hosi asaun ki’ik sira.
“Ita tenke la’o nafatin tuir koridór Amu Papa nian ne’ebé dehan labele kole atu halo di'ak, haka'as-an halo di'ak mak barak. Dalaruma ita hanoin liu dehan atu halo di'ak iha buat ne'ebé boot kedas, maibé ita tenke halo di'ak iha buat ne'ebé ki'ik oan kedas mak ba boot. Hanoin di’ak, hakarak di’ak, hakarak halo di’ak, hahú kedas hosi ita-nia laran ne’ebé hakarak di’ak mak sai mai ba to’o li’ur. Maibé la’os hahalok di’ak no hakarak di’ak de’it, maibé tenke konta mós Maromak ninia partisipasaun iha ita-nia halo di’ak no ita-nia hakarak di’ak,” Padre Bento dehan, ohin (15/3), iha nia knaar-fatin, Arkidioseze Dili.
Padre Bento mós afirma katak, kuarezma hanesan tempu oportunu ba sarani sira atu prepara-an hodi besik liután ba Maromak, liuliu sarani sira buka atu muda hahalok aat sira no aplika buat ne'ebé di'ak.
“Kuarezma ne’e tempu ida ne'ebé mak santa kreda prepara ka disponibiliza ba ema sarani sira atu prepara sira-nia an loron 40 nia laran, molok atu to’o ba iha selebrasaun páskua ne'ebé mak sai hanesan selebrasaun importante no boot liu hotu iha ema sarani sira-nia moris, kuarezma ita hatene ona, hanesan tradisaun hahú kedas hosi kuarta-feira sinzas, ne'ebé mak sarani sira ba simu sinzas, hodi hahú tempu ida ne’e, tempu ida ne’e ita bele konsidera mós hanesan tempu esforsu ida ne'ebé marka ho moris ema sarani sira nian, ne'ebé hahú ho sarani sira nia jejún, abstinénsia, sakrifísiu, no ema sarani sira-nia karidade ne'ebé tenke halo liután, no sarani sira-nia orasaun ne'ebé tenke maka’as liután,” esplika Padre Bento.
Padre Bento hateten tán katak, nu'udar sarani ne'ebé di'ak presiza iha moris espirituál ne'ebé liga ho moris konkretu. Moris di'ak ho haksolok la'os ho materiál ne'ebé sufisiente maibé moris haksolok tenke mai iha ema nia totalidade ka an tomak.
Fonte: Timor News