Dili, 06 Outubru 2021 – Rezultadu hosi relatóriu investigasaun ida hatudu katak Padre iha Igreja Katólika Franseza halo ona abuzu sexuál ba labarik hamutuk na’in-216.000 ne’ebé maioria halo ba labarik mane.
BBC News haktuir iha tersa (05/10) ne’e, Xefe investigasaun hateten katak kuaze pedófilu ka autór hamutuk 2.900 to’o 3.200 iha Igreja Katólika Franseza mak halo kazu hirak ne’e, no nia akuza Igreja tanba hatudu indiferensa (inglés, not carring about) ne’ebé kruél tebes ba vítima sira.
Relatóriu investigasaun temi katak, maioria hosi vítima 216.000 ne’e mak labarik mane sira ne’ebé barak ho idade tinan entre 10 to’o 13.
Papa Francisco ‘sente moras’ wainhira Nia rona tiha kona-ba rezultadu hosi investigasaun refere, haktuir komunikadu ida hosi Vatikanu.
“(Papa) Ninia hanoin dahuluk mak kona-ba vítima sira, ho profunda tristeza ba kanek no gratidaun ne’ebé sira sente hodi aprezenta,” temi iha komunikadu ne’e.
Fundadór Victims’ Association La Parole Libérée, ho naran François Devaux, hateten katak, ida ne’e nu’udar ‘traisaun ba konfiansa, traisaun ba morál, traisaun ba labarik’.
Investigasaun ka inkéritu ida ne’e enkomenda hosi Igreja Katólika Franseza iha tinan 2018, ho ninia prosesu gasta tempu tinan rua resin, envolve Tribunál, Polísia no Igreja rasin, no komunika mós ho vítima no testemuña sira.
Kazu barak tebes mak ekipa investigadór relata katak tuan liu tiha ona atu prosesa bazeia ba lei franseza.
Fonte: BBC News