Bobonaru, 28 Setembru 2023 - Prezidente Autoridade Munisípiu Bobonaru (PAMB), Ernesto de Oliveira Barreto, hateten katak eleisaun suku periodu 2023 to'o 2030 iha munisípiu Bobonaru nia hakarak fó prioridade liu ba feto hodi kompete no sai xefe suku, tanba ne’e nia husu ba entidade hotu-hotu tantu nasionál no lokál atu fó apoiu másimu ba lideransa feto sira.

“Eleisaun xefe suku besik ona, hanesan PAMB ha’u hakarak períodu ida ne’e feto mak barak. Ha'u mós sei fó oportunidade ba iha feto hodi kompete ba iha vaga ne’ebé sekarik loke iha tinan oin. Kultura labele sai barreira ba inan feton sira, kultura buat ketak ida, lei buat ketak ida, tanba lei hatuur tiha ona katak feto mós iha direitu atu sai lideransa no seluk tan”,  Ernesto dehan lia hirak ne'e iha okaziaun enkontru ho asosiasaun lideransa feto munisípiu no sorumutu ho grupu traballu jéneru munisípiu Bobonaru hamutuk ho Sekretária Estadu Igualdade (SEI), Elvina Sousa Carvalho, akompaña hosi Diretór Jerál SEI, Armando da Costa, Xefe Departamentu Abordajen Integrada Jéneru no Inkluzaun, Hermínio Xavier iha Kinta (28/09) iha Bobonaru.

Iha fatin hanesan SEI, Elvina Sousa Carvalho, apresia ba iha Assosiasaun feto Munisípiu Bobonaru ne’ebé iha tempu barak sente abandona maibé sira kontinua hamriik metin nafatin, tanba ne'e nia husu atu lideransa feto munisípiu tenke unidade no hamutuk hodi bele enkoraja no motiva malu atu partisipa no kandidata an iha eleisaun suku iha períodu ida ne'e, inklui prepara an atu hakat ba eleisaun asembleia munisipál iha tinan oin, nune’e bele haree iha mudansa númeru feto iha nível foti desizaun iha munisípiu Bobonaru.