Dili, 07 Outubru 2021 – Eiz Prezidente Repúblika Timor-Leste José Ramos-Horta, informa katak, nia lori produtu kafé Timor tama ba Santa Sé hodi entrega ba Papa Francisco.
Horta esplika, iha kuarta (06/10) dadeer nia hala’o reuniaun formál ho Papa Francisco no hafoin reuniaun remata, Eiz Prezidente Repúblika aprezenta kafé Timor ba Líder Igreja Katólika ne’e nu’udar jestu diplomasia ida.
“Ha’u atan sarani hateten liafuan ruma ba Ita Katóliku sira-nia Aman Boot ho lian Español: Santu Padre, nu’udar ema hosi Argentina Amu Santu hemu karik kafé dadeer-dadeer, Amu Santu tenke hemu de’it Kafé Timor ke DI’AK liu iha mundu... di’ak liu Kafé Brasil di’ak liu kafé Kolombia!; Amo Papa hatán nune’e: Kafé Timor-Leste di’ak liu Kafé Costa Rica? Di'ak Liu! Amu Santu. Kafé Timor di’ak liu Kafé hotu-hotu iha Mundu!; Amu Papa Francisco hamanasa no ha’u aumenta tán liafuan ruma tuir mai ne’e: Amu Santu... Ha’u bele fahe informasaun ba Povu Timor ke Santu Padre hemu de’it KAFÉ TIMOR?; Amo Santu hatán ho fuan, hamanasa: Bele!,” Horta konversa ho Papa Francisco, tuir nia divulgasaun ofisiál ohin (07/10).
Hafoin konversa, Ramos-Horta entrega kedas kafé Timor ba Papa Francisco, no oferese mós ba membru Júri sira ba Prémiu Fraternidade Humana, ne’ebé inklui mós Ramos-Horta.
“Ha’u haree Kardeal lubuk ida hamriik besik Amu Papa haree ha’u intrega kafé ba Amu Papa sira kabeen suli... Kardeal sira n’e mós sei hemu de’it Kafé Timor,” Horta dehan.
Ramos-Horta sai hosi Timor-Leste hodi ba Roma iha 04 Outubru 2021 liubá ho aviaun espesiál hafoin besik tinan rua ona nia la halo viajen ba rai-li’ur, no sei fila hikas mai Timor-Leste iha 14 Outubru.
Fonte: Pájina Ofisiál José Ramos-Horta