Dili, 29 Abril 2022 – Parlamentu Nasionál hala’o debate ohin (29/4) no aprova ona pedidu prioridade no urjénsia Orsamentu Jerál Estadu (OJE) Retifikativu 2022 ho montante billaun $1.1 ne’ebé propoin hosi parte Governu atu hodi finansia medida komplementár hamutuk 13 ne’ebé inklui mós subsídiu désimu terseiru ho montante $200 ba kada uma-kain ne’ebé sei simu iha fulan Dezembru.
Hafoin debate tiha, membru Parlamentu Nasionál sira halo votasaun no ikus mai rezulta votu a favór 37, kontra 20 no abstensaun 3.
Medida komplementár 13 ne’ebé sei finansia hosi OJE retifikativu 2022 ne’e mak hanesan: i) Kriasaun Fundu Veteranu ho orsamentu alokadu billiaun $1; ii) Atribuisaun Pagamentu Désimu Terseiru $200 ba kada família ka uma-kain iha fulan Dezembru (exeptu funsionáriu públiku sira) ho orsamentu alokadu millaun $70; iii) Uma Kbiit Laek Plus ho orsamentu alokadu millaun $25; iv) Bolsa Estudu ba Mellór Graduadu Estudante Ensinu Báziku no Sekundáriu ho orsamentu alokadu millaun $7.5; v) Programa Mão de Obra ba postu-administrativu, millaun $7.2; vi) Revitaliza kafé no subsídiu ba kafé laku-teen ho orsamentu alokadu millaun $6,4; vii) Pagamentu ba diferensa remunerasaun PNTL nian ho rejime salariál foun, ba membru PNTL 4.096 ho orsamentu alokadu millaun $5.1; viii) Harii Sede Arte Marsiál no Rituál millaun $2.5; ix) Programa Eskola iha Uma ho orsamentu alokadu millaun $2.1; x) Internet gratuita iha eskola sira, millaun $1.1; xi) Subsídiu akomodasaun ba PNTL no F-FDTL ho orsamentu alokadu millaun $1.9; xii) Estabelesimentu Sekretaria ba Asuntu Traballadór iha rai-li’ur no Komunidade Timoroan iha Diáspora rihun $500; xiii) Empregu ba mellór alunu universitáriu sira rihun $437,5.
Debate refere hetan partisipasaun direita hosi Ministru Finansa Rui Gomes, ho ninia Vise Ministru António Freitas, no Ministru ba Asuntu Parlamentár no Komunikasaun Sosiál Francisco Jerónimo. Prezidente Parlamentu Nasionál, Aniceto Guterres Lopes, iha 27 Abríl liubá simu direita proposta OJE Retifikativu 2022 ne’e iha ninia fatin, ne’ebé entrega hosi Ministru Francisco Jerónimo.
Fonte: Ministério das Finanças (MF)