Dili, 26 Outubru 2021 – Parlamentu Nasionál liuhosi Sesaun Plenária prezide hosi Prezidente Parlamentu Nasionál Aniceto Guterres Lopes, ne’ebé hala’o ohin (26/10), autoriza Prezidente Repúblika Francisco Guterres Lú Olo hodi deklara renovasaun Estadu Emerjénsia (EE) ba dala-19 ba loron 30 tán, ne’ebé sei vigora hahú hosi 30 Outubru to’o 28 Novembru 2021.
Hosi diskusaun naruk, Deputadu sira autoriza deklarasaun EE liuhosi votasaun ne’ebé rezulta votu à favór 43, kontra 5 no abstensaun 12.
“Pedidu autorizasaun ne’e bazeia ba kazu Covid-19 ho númeru pasiente ne’ebé baixa iha ospitál balu iha estadu grave tanba la simu vasina. Iha semana ikus ne’e, kazu Covid-19 hahú redúz ona maibé sei eziste hela númeru baixa no liga ba partisipasaun vasinasaun ne’ebé sei menus hosi munisípiu balu,” Parlamentu Nasionál esplika iha nia divulgasaun ofisiál ohin.
Tanba ne’e, ho EE Governu iha kbiit natón hodi halo prevensaun di’ak liután liuliu iha pontu entrada sira no aumenta númeru vasinasaun iha teritóriu nasionál.
Fonte: Media Parlamento Nacional