Ermera, 05 Agostu 2021 – Pasiente Covid-19 ho inisiál JDS ne’ebé izola-an iha kuarentena Sentru Saúde Gleno, hato’o nia preokupasaun ba Provedoria ba Direitu Umanu ho Justisa (sigla portugés, PDHJ) via telefone iha kinta (05/8) ne’e, relasiona ho kondisaun hosi fasilidade sira ne’ebé Estadu prepara iha kuarentena refere ne’ebé nia konsidera katak aumenta fali sofrimentu ba pasiente Covid-19 sira.
JDS hateten, iha Ermera espasu kuarentena limitadu tebes nune’e obrigatoriamente pasiente balu transfere tiha ba Dili. Iha kuarentena ne’ebé nia izola-an, fatin toba no fornesimentu bee ladún favorável.
Nia mós kestiona kona-ba kompañia fornesedór hahán ne’ebé dalaruma tarde lori hahán ba pasiente, no laiha bee-manas ba pasiente sira atu hemu.
Tanba ne’e, pasiente sira iha kuarentena refere sujere ba Estadu atu tau atensaun ba kondisaun sira kuarentena nian iha Ermera hodi atende pasiente ho lalais, di’ak no ordenadu hodi evita númeru kazu Covid-19 sa’e.
Fonte: Provedoria dos Direitos Humanos e Justiça (PDHJ)