Dili, 06 Janeiru 2021 – Patraun mikrolete públiku ne’ebé sirkula iha Dili laran balu hirus no sei ko’a Motorista sira-nia saláriu tanba sira entrega osan kada loron menus liu ka la tuir akordu ne’ebé parte rua halo ona molok implementasaun Estadu Emerjénsia (EE), tuir informasaun ne’ebé jornalista Timor News hetan iha kuarta (06/01) ne’e, hafoin dada lia ho Motorista mikrolete públiku balu ho númeru sirkulasaun 03, 06 no 07 ne’ebé lakohi atu fó sai sira-nia identidade.

Motorista sira haktuir katak sira la hetan rendimentu ne’ebé boot ka sufisiente hodi entrega osan tuir akordu, tanba pasajeiru menus liu relasiona ho suspensaun balu ne’ebé Governu halo durante implementasaun EE ba dasiak hodi prevene diseminasaun Covid-19.

Dalaruma balu tenke entrega $25 ka $30 kada loron ba Patraun maibé osan la to’o no entrega de’it $15 entaun Patraun hirus no balu sira-nia saláriu ko’a tiha.

“Seidauk EE ne’e ami hetan $50 ka $60 resin maibé iha EE ne’e ami hetan mak $25 lae $30 de’it ne’e sei enxe tán mina $15 no entrega ba Patraun la to’o ba Patraun hirus fali ami ka entrega la to’o Patraun ko’a fali ami-nia osan (saláriu),” informa Motorista ida ne’ebé husu atu labele publika nia identidade.

Iha Motorista balu tán ne’ebé hato’o informasaun hanesan mós, tanba ne’e mak sira husu Governu atu halo despaixu ruma hodi informa ba Patraun sira atu labele obriga Motorista sira hodi entrega osan kada loron tuir akordu durante implementasaun EE dasiak ne’e tanba pasajeiru mak menus duni.