Dili, 30 Setembru 2021: Primeiru-Ministru (PM) Taur Matan Ruak, iha kinta (30/09) ne’e, asina komprimisu ida atu aselera progresu eliminasaun moras Tuberkuloze (TB) iha Timor-Leste iha tinan 2025.
“Ho asina ohin-loron, ha’u reenfatiza fali ha’u-nia kompromisu ba luta no hapara tuberkuloze iha Timor-Leste,” dehan Taur Matan Ruak iha salaun City-8 Manleuana, Dili.
Ministra Saúde Odete Maria Freitas Belo ne’ebé partisipa mós iha serimónia refere hateten, Governu halo kompromisu refere tanba iha planu estratéjiku ba moras TB nian mak hakarak elimina tiha tipu moras ida ne’e iha tinan lima oin mai.
“Hanesan kompromisu ida ba timoroan sira atu bele luta hasoru moras tuberkuloze tanba iha ita-nia planu estratejia ba TB nian, ita hakarak elimina moras TB ne'e iha tinan 2025 […] atividade lubuk ida mak ita hakarak halo mak atu hakotu moras TB ne'e iha ita-nia rain,” dehan Ministra.
Iha fatin hanesan, reprezentante Organizasaun Mundiál Saude (OMS) iha Timor-Leste, Arvid Mathur komprometidu sei kontinua fó apoiu ba programa nasionál Ministériu Saúde nian liuhosi haforsa no hadi’ak liután resposta nasionál hodi aselera esforsu hapara tuberkuloze.
Timor-Leste nia taxa insidénsia númeru segundu aas liu iha Rejiaun Sudeste Aziátiku no taxa mortalidade estimasaun TB númeru segundu aas liu iha mundu. Mal-nutrisaun no fuma mak kauza prinsipál rua koñesida ba epidemia tuberkuloze.
Fonte: Mídia Palácio das Cinzas