Ossu, 14 Maiu 2022 - Primeiru Ministru (PM), Taur Matan Ruak, hateten ba na'in kompañia Uhacae ne'ebé halo konstrusaun estrada trosu Larigutu-Ossu katak serbisu ne'ebé ita halo la'os atu buka osan de'it ba ita-nia an maibé tenke hanoin mós benefísiu ba ita, ita-nia família, oan no bei-oan sira.
"Ita hotu iha prinsípiu katak serbisu ne'ebé ita halo la'os atu buka osan de'it ba ita-nia an, maibé hanoin mós benefisiu ba ita-nia oan no bei-oan sira ne'ebé atu goja rezultadu hosi serbisu ida ne'e. Estrada ne'e ita-nia familiá mak sei uza, ita mak sei uza, la'os povu hosi nasaun seluk. Buat ne'ebé imi halo ne'e ba Timor.
PM hatutan katak nia hakarak atu emprezariu Timoroan sira hatudu katak sira mós bele, tanba projetu no osan lakon sei bele hetan fali maibé kredibilidade no konfiansa ne’e bainhira lakon, sei susar atu hetan fila-fali.
Liafuan ne’e PM hato’o ba na'in hosi Kompañia Uhacae bainhira hala'o inspesaun ba iha konstrusaun estrada Larigutu-Ossu ho distansia 6KM, kustu millaun $4.8, ne'ebé hahú iha tinan 2017 maibé seidauk finaliza to'o agora.
Tuir konkordansia entre Minsiteriu Obras Públikas no kompañia, projetu ne'e to'o fulan-dezembru Kompañia tenke konklui to’o sub basecore atu entrega fali ba Kompañia internasionál Covex hodi finaliza tuir padaraun ne'ebé asina, ba estrada trosu Venilale-Vikeke.
Fonte: Mídia Gabinete do Primeiro-Ministro (GPM)