Lautén, 07 Janeiru 2022 – Primeiru Ministru (PM), Taur Matan Ruak, sexta (07/01) ne’e, hala'o diálogu ho autoridade lokál no komunidade sira iha munisípiu Lautén ho tema ‘Reforsa Reziliénsia Nasaun nian' no diskute mós asuntu importante tolu mak hanesan, kombate Covid-19, hasa’e taxa partisipasaun iha votasaun no ezekusaun Orsamentu Jeral Estadu (OJE) 2022.
Iha diálogu refere, PM hatete katak, tinan 2022 hanesan tinan ne'ebé determina ona ba realizasaun eleisaun prezidensiál. Tanba ne’e PM, autoridade lokál no komunidade sira diskute asuntu importante sira mak hanesan, kombate Covid-19 liuliu variante foun Omicrom liuhosi vasina, eleisaun Prezidensiál tenke hametin pás no estabilidade atu nune’e iha liberdade ba espresaun kampaña festa demokrasia no hasa’e taxa partisipasaun iha votasaun.
Alein hosi ne’e, Xefe Governu esplika dezenvolvimentu ekonómiku no ezekusaun OJE 2022 ho programa mak hanesan, Uma ba Kbi’it Laek, programa sesta bázika no kontinua sosa produtu lokál. Tanba ne’e PM husu komunidade tenke prodús produtu lokál barak liu tán hodi fornese ba programa sesta bázika, inklui programa seluk ne’ebé Governu implementa hodi hasa’e kresimentu ekonomia iha rai-laran.
Enkuantu PM husu ba populasaun tomak atu servisu hamutuk hadi’a ekonomia uma-laran, tanba hamutuk mak sei sai forsa liután hodi kontra hasoru dezafiu sira.
Fonte: Mídia Ministério das Obras Públicas (MOP)