Ermera, 11 Outubru 2021: Primeiru-Ministru (PM) Taur Matan Ruak haktuir ba populasaun sira iha postu-administrativu Letefoho, munisípiu Ermera, iha segunda (11/10) ne’e, kona-ba mensajen hosi Reprezentante Vatikanu nian iha Timor-Leste, ne’ebé husu ba nia atu enkoraja populasaun sira hodi simu vasina nu’udar pré-kondisaun atu prepara-an ba Papa Francisco nia vizita mai Timor-Leste iha nia viajen papál ba Ázia no Pasífiku iha inísiu tinan 2022 ne’ebé ajenadu ona hosi Vatikanu.
“Ita-boot sira rona, Reprezentante Papa nian iha ita-nia rain, ami na’in rua ko’alia nia dehan hanesan ne’e: Sr. Primeiru-Ministru ita boot bele hateten ba sidadaun sira tanba ha’u hatene Timor maioria Katóliku, sé hakarak Papa mai entaun tenke vasina, tanba Papa kuandu mai vizita, ita tenke vasinadu hotu ona, seguru ona mak nia mai,” haktuir Xefe Governu iha Letefoho.
Foin daudauk Reprezentante Vatikanu iha reuniaun ida ho Xefe Governu hodi haktuir inisiativa Papa Francisco nian atu vizita Timor-Leste iha tinan oin, maibé Papa husu atu sarani timoroan sira tenke simu ona vasina, atu labele iha risku wainhira halibur malu lubun boot hodi simu nia prezensa iha Timor-Leste.
Fonte: Mídia Gabinete do Primeiro-Ministro (GPM)