Ermera, 12 Outubru 2021: Primeiru-Ministru (PM) Taur Matan Ruak hateten katak suku 70 resin iha Timor-Leste seidauk hetan liña eletrisidade tanba veteranu sira hadau malu atu kaer projetu dada liña eletrisidade.
“Eletrisidade to’o agora barak mak seidauk (hetan) ne’e liuliu tanba hadau malu, veteranu sira hadau malu, dehan jujur de’it. Ha’u ba iha suku ida iha Maubara, veteranu sira iha ne’ebá dehan, ‘Sr. Prezidente, ami iha Maubara ne’e veteranu laiha be veteranu hosi Baukau nian mak mai dada fali eletrisidade iha ne’e?’. Ha’u dehan, 'katuas sira ha’u la sibuk, sé veteranu Maubara ka Baukau ka ida ne’ebé nian, ha’u hakarak ne’e ahi tama uma' […]. Ha’u ba iha Mausiga, sira hadau malu [...]. Ai-riin nahe de’it iha Mausiga, tama ba suku laran ne’e susar," PM Taur dehan, ohin (12/10), hodi responde ba komunidade iha postu-adminsitrativu Hatulia sira-nia preokupasaun kona-ba eletrisidade ne’ebé sira hato’o ba Taur wainhira nia halo kampaña vasinasaun iha Hatulia, Ermera.
PM Taur esplika katak, iha tinan ida ne’e parte Governu sei kompleta tenderizasaun ba dada liña eletrisidade ba suku 70 resin, nune’e, sei lori tempu atu hatama eletrisidade ba suku sira ne'e maibé sei la’o ba oin.
“Ikus-ikus ne’e ha’u haree veteranu sira koopera maka’as no la hanesan uluk. […] Eletrisidade ne’e sei lori tempu maibé sei ba oin, nune’e husu para koopera, labele hadau malu,” PM Taur akresenta.
Fonte: Mídia Gabinete do Primeiro-Ministro (GPM)