Dili, 05 Maiu 2022: Primeiru-Ministru (PM), Taur Matan Ruak, sente haksolok no apresia wainhira komunidade sira dada bandeira Timor-Leste iha ida-idak nia uma oin hodi komemora loron Restaurasaun Independénsia 20 Maiu.
“Ha’u hanoin loron importante loron orgullu ba ita-nia nasaun, ba ita tomak, ha’u hanoin ha’u agradese hotu-hotu dada bandeira iha uma ne’e di’ak, kapás no furak loos,” Taur dehan, ohin (05/5), hafoin hasoru malu tiha ho Prezidente Repúblika, Francisco Guterres Lú Olo, iha palásiu prezidensiál, Dili.
Kona-ba preparativu sira hodi komemora loron Restaurasaun Independénsia no mós investidura ba Prezidente Repúblika eleitu foun, José Ramos Horta, Xefe Governu ne’e dehan katak oras ne’e atinje ona pursentu 70 (70%), no preparativu sira la’o di’ak.
Fonte: Timor News