Dili, 10 Janeiru 2022 - Parlamentu Nasionál (PN) liuhosi sesaun plenária, ohin (10/01) ne’e, aprova ona iha finál globál proposta Lei n.º 27/V/3ª – enkuadramentu orsamentu jerál estadu no jestaun finanseiru públika.

Ho aprovasaun lei refere, ministru finansas, Rui Gomes hatete katak, Timor-Leste halo pasu importante dahuluk iha ámbitu reforma jestaun finanseiru públiku.

“Ho aprovasaun ne’e signifika Timor-Leste halo pasu importante dahuluk iha ámbitu reforma jestaun finanseiru públika no ita konsege estabelese rejime jurídiku ida ke bele rezolve defisiénsia oioin iha rejime orsamentál atuál. Iha lei ne’e rasik, ita sei hetan definisaun klaru kona-ba konseitu perimetru orsamentál no sei redúz rigidez iha enkuadramentu orsamentál,” dehan Rui Gomes hafoin aprovasaun lei refere iha PN.

Enkuantu, Rui Gomes esklarese tan katak, lei enkuadramentu orsamentál ne’e sei substitui Lei Orsamentu Jestaun Finanseira (LOJF) atuál ne'ebé iha ona vijénsia liu dékada ida nia laran. Alterasaun hirak ne'e importante no urjente atu hatán ba limitasaun sira iha LOJF atuál no diploma foun ida-ne’e sei revoga Lei n.º 13/2009, LOJF 21 outubru.