Dili, 28 Juñu 2021 – Porta-vóz Komandu Jerál Polísia Nasionál Timor-Leste (PNTL) Superintendente Xefe Arnaldo de Araújo informa ohin (28/6) katak, Polísia munisípiu Díli buka tuir hela ema balu ne’ebé sunu bandeira Portugál relasiona ho rezultadu derota ne’ebé Portugál hetan iha kopa Euro 2020 kontra Béljika ne’ebé hala’o ohin 04:00 am otl.
“Insidente ne’e akontese tanba de’it jogu entre Portugál ho Béljika ne’ebé mak Portugál lakon, sira ne’ebé mak simpatizante ba Portugál sente la kontente no ema balu ne’ebé mak laiha responsabilidade sunu bandeira Portugál, no oras ne’e daudauk suspeitu sira ne’e Polísia Munisípiu Dili buka tuir hela no hein katak iha tempu badak suspeitu sira ne’e sei kaptura hotu no sei halo prosesu tuir regra ne’ebé mak iha,” Arnaldo de Araújo informa iha nia knaar-fatin, Dili.
Nia akresenta, wainhira fanátiku ba nasaun ida iha jogu sira tenke pronto simu rezultadu saida de’it mak nasaun ne’e hetan no labele sunu fali bandeira.
“Labele sunu fali bandeira no símbolu nasaun ida nian tanba ida ne’e hatudu katak ita la respeita nasaun sira seluk,” deha Porta-vóz ne’e.
Enkuantu iha jogu ne’e, Béljika halakon Portugál ho golu 1-0, tanba ne’e Béljika sei hakat ba faze tuir mai no Portugál tenke sai ona hosi kopa Euro 2020.
Fonte: Timor News