Dili, 25 Setembru 2021 – Polísia Nasionál Timor-Leste (PNTL) liuhosi patrullamentu konjunta entre Kompañia Operasaun Espesiál (sigla portugés, COE), Batallau Órden Públika (BOP) no Unidade Patrullamentu Fronteira (UPF) ne’ebé destaka iha postu Memo, Bobonaru, kaptura suspeitu na’in-3 iha sábadu (25/9) ne’, iha área mota Soilo ne’ebé baliza entre suku Tapo Memo no suku Saburai, Maliana, tanba tenta hakat liu fronteira ho ilegál ho intensaun atu ba na’ok karau iha Atambua, Indonézia.
“Identifika suspeitu na’in-8 ne’ebé deskonfia na’ok karau iha Atambua, Indonézia, hodi lori mai Timor-Leste, no konsege kaptura na’in-3 inklui evidénsia hanesan karau tali ne’ebé uza hodi lasu karau [...] enkuantu na’in-5 seluk konsege halai,” Komandante Unidade Espesiál Polísia (UEP) Superintendente Xefe Polísia Orlando Gomes informa via telefone.
Nia akresenta katak sira na’in-3 ne’ebé kaptura ne’e entrega ona ba Komandu PNTL Bobonaru, no sira sei kumpri uluk kuarentena hafoin prosesa hikas tuir lei ba prosesu kriminál ne’ebé vigora iha Timor-Leste.
Fonte: Mídia Serviço Relações Públicas de Ministério do Interior