PNTL LA KONTROLA ONA SIDADAUN SIRA-NIA KARTAUN VASINA
Dili, 30 Setembru 2021 – Polísia Nasionál Timor-Leste (PNTL) la kontrola ona sidadaun sira-nia kartaun vasina hahú ohin (30/9) ba oin tanba medida ba implementasaun Estadu Emerjénsia (EE) ba dala-18 la ko’alia kona-ba ida ne’e.
“Hahú ohin ba oin sidadaun hotu livre halo movimentu iha rai-laran no PNTL la kontrola ona kartaun vasina tanba EE dala-18 la ko’alia kona-ba ida ne’e,” Komandu PNTL informa liuhosi nia divulgasaun ofisiál.
Maske nune’e, Komandante Operasaun Nasionál Superintendente Xefe Pedro Belo informa katak Komandu PNTL sei la retira membru PNTL hotu-hotu hosi postu temporáriu sira iha pontu entrada sira.
“PNTL la retira membru hotu maibé redúz de’it membru balu atu reforsa no kontinua halo sensibilizasaun ba ita-nia komunidade no loja sira tanba EE ba dala-18 rezolusaun Governu ba ezekusaun iha pontu lubuk ida ne’ebé sei bandu ema labele halibur malu iha fatin feira (pameran), programa happy hour no atividade seluk ne’ebé halibur ema barak,” dehan Komandante Belo, iha kinta(30/09) ne’e, iha Kuartél Jerál PNTL, Kaikoli, Dili.
Postu temporáriu hirak ne’ebé PNTL harii mak iha pontu entrada Tasi-Tolu, Balibar, Kasnafar no Metinaru.
Fonte: Mídia Polícia Nacional de Timor-Leste (PNTL)
