Dili, 26 Marsu 2021 – Hafoin simu orientasaun servisu hosi Komandu Jerál Polísia Nasionál Timor-Leste (PNTL), Polísia Tránzitu Nasionál hamutuk ho Tránzitu Munisípiu Dili, iha kinta (25/3) kalan ne’e, halo operasaun pasa revista ba viatura sira ne’ebé halo movimentu iha tempu kalan, hodi asegura nafatin regra serka sanitária iha kapitál Dili iha tempu kalan, tuir dekretu Governu nian relasiona ho pandemia Covid-19 ne’ebé oras ne’e tama ona ba nivel transmisaun lokál.
Komandante Polísia Tránzitu Nasionál Superintendente Polísia João Belo, iha entrevista hateten, operasaun refere halo hodi limita movimentu transporte ne’ebé la nesesáriu no dezinfekta mós veíkulu sira.
“Ida ne’e operasaun konjunta entre Tránzitu Nasionál ho Tránzitu Munisipiu Dili ho atividade rua mak hanesan, ami halo operasaun ijiene hodi dezinfekta veíkulu sira ne’ebé halo movimentu iha estrada públiku no atividade seluk mak ami ezekuta regra Serka Sanitária,” dehan João Belo.
Nia mós husu sidadaun sira iha kapitál Dili atu labele halo movimentu ba objetivu ida ne’ebé la nesesáriu durante implementasaun serka sanitária tantu iha tempu loron ka kalan.
Fonte: Mídia Polícia Nacional de Timor-Leste (PNTL)