Dili, 29 Novembru 2021 – Komandante Polísia Tránzitu Munisípiu Dili, Inspetór Polísia Domingos Sarmento Gama, hateten katak oras ne’e polísia tránzitu liuliu munisípiu Díli uza de’it transporte tuan sira molok 2007 ka 2008 no balu labele hadi’a ona, nune’e difikulta sira atu hala’o servisu patrullamentu.
“Transporte sira ne’ebé mak polísia tránzitu liuliu Dili nian iha ne’e mesak transporte tuan ida ke simu antes 2007/2008. Sé transporte 2007/2008, pelumenus uza liu ona tinan 14 ka 15 nia laran, entaun kondisaun mós kuaze aat ona no atu halo manutensaun mós labele, semana rua ba kotuk transporte aat hotu, totalmente aat hotu, entaun atividade paradu atu halo kontrolu ba movimentu transporte,” Domingos Gama informa ba jornalista Timor News, ohin (29/11), iha nia knaar-fatin, Kaikoli, Dili.
Nia akresenta katak, Governu tenke halo investimentu ba polísia tránzitu atu nune’e polísia tránzitu bele hetan reseita boot hodi hatama ba Estadu.
“Sé ezemplu, Governu mak halo investimentu ba polísia tránzitu [...], ha’u hanoin tinan-tinan ita bele hatama reseita ba Estadu dólar amerikanu 300 mil ka 400 mil. Tanba ne’e ita hein Governu para oinsá mak bele halo investimentu mai polísia tránzitu. Polísia tránzitu ne’e hanesan fatin ida ne’ebé mak bele hatama reseita ba Governu, reseita boot ba Governu, tanba ne’e presiza investe ba transporte ka kondisaun ruma atu nune’e bele apoia servisu polísia tránzitu nian,” Domingos Gama dehan.
Fonte: Timor News