Kovalima, 12 Janeiru 2022 – Atuál Ministra Saúde (MS), Odete Maria Freitas Belo, iha tersa (11/01) ne’e, partisipa iha diálogu Primeiru-Ministru, Taur Matan Ruak ho autoridade lokál no komunidade sira iha Kovalima, no nia hatete katak, polítika Ministériu Saúde (MS) sei harii postu saúde ida kada suku pur fazeadamente.
“Ha’u atu ko’alia kona-ba postu saúde, hanesan ita hatene iha suku atus haat resin, Ministériu Saúde ninia polítika atu harii postu saúde ida-idak iha suku ida-idak, maibé ita sei la harii dala ida, ita sei halo fazeadamente,” dehan Ministra Saúde wainhira partisipa diálogu ho autoridade no komunidade sira iha Aero Portu Xanana Gusmão Suai.
Enkuantu MS subliña tan katak, MS iha ninia kritéria wainhira harii postu saúde iha suku sira bazeia ba númeru abitante entre 1000 to'o 1500. Tanba ne’e MS sujere ba xefe suku sira halo analiza ida hodi tau hamutuk suku rua ka tolu hodi prienxe kritéria MS nia atu bele harii postu saúde ida.
Fonte: Mídia Palácio das Cinzas