BBC, 8 Maiu 2022 - relasiona ho eleisaun prezidensiál Filipina nian iha momentu ne’ebá, iha ema ida naran João (la’os naran tebes nian), polítiku sira selu ka kontrata nia hodi habelar informasaun falsu iha mídia sosiál ho objetivu atu benefisia kandidatu hosi ninia kliente hodi bele sai manan na’in iha eleisaun refere.

João hatete katak nia servisu hosi tuku 10:00 dader to’o fali tuku 03:00 madrugada maneija pájina Facebook no perfíl falsu rihun-ba-rihun hodi bele fó benefísiu ba polítiku sira iha sira-nia kampaña eleitorál. Ninia kliente sira inklui governadór, kongretista no prezidente munisípiu sira.

João nu’udar parte ida hosi ekosistema ne’ebé espalla informasaun falsu. Nia hatete katak iha ajente hamutuk 30 hanesan ne’e, ne’ebé servisu diretamente ho nia hodi espalla lia bosok hodi apoia sira-nia kliente. Mekanizmu ne’ebé sira uza inklui modifika polítiku koñesidu sira-nia númeru telemóvel no haruka sai mensajen ba ema barak no kria pájina no grupu hodi fó sai propaganda sira. 

Iha momentu ne’ebá, Meta ne’ebé na’in ba Facebook hatete katak sira apaga tiha konta, pájina, no grupu sira 400 liu ne’ebé koko atu manipula ema no viola sira-nia polítika uzu nian.

Iha entrevista ho kanál notísia Filipina nian ida, kandidatu prezidensiál Leni Robredo hatete katak ninia abordajen inisiál ba problema notísia falsu mak atu ignora tiha deit, maibé la lao ho di'ak, tanba “bainhira lia bosok repete ba beibeik, dala barak sai lia loos.”

Le’e notísia kompletu iha ne’e.