Dili, 14 Janeiru 2022: Primeiru-Ministru Taur Matan Ruak hateten katak populasaun ne’ebé hatuur uma arbiru iha sidade Dili laran, Governu sei haruka ba hela hotu iha suku Hera tuir planu ordenamentu sidade Dili ne’ebé daudauk ne’e Ministériu Planu Ordenamentu halo hela estudu.
Primeiru-Ministru hateten ida ne’e, ohin (14/01), wainhira halo diálogu ho autoridade munisípál no komunitária Dili, iha CCD, Dili, no nia akresenta katak oras ne’e kapitál Dili dezorganizadu no susar tebes atu kontrola, nune’e ninia solusaun mak VIII Governu sei kria abitasaun organizadu ida ho uma rihun rua iha Hera ne’ebé nia prosesu la’o hela hodi prepara ba komunidade sira ne’ebé hatuur uma arbiru iha sidade Dili, maibé prioridade liu ba re-aloka uluk komunidade sira ne’ebé hela iha fatin sira risku ba inundasaun no rai monu no ba sira ne’ebé okupa rai Estadu.
“Ita prepara kondisoins iha Hera, hanesan uma kbiit-laek, iha Díli la hetan, iha de’it Metinaru ho Ataúru, Dili la hetan tanba saida? Ita presiza planu re-ordenamentu Dili, í daudauk Ministériu Obras Publika prepara kondisoins iha Hera, para halo uma ba família rihun rua para ké populasaun sira tuur arbiru sidade laran bele ba iha ne’ebá organizadu,” Primeiru-Ministru dehan.
Xefe Governu mós garante bee-moos no fasilidade ne’ebé di’ak iha abitasaun organizadu ne’ebé Governu atu kria iha Hera ne’e.
Fonte: Mídia Gabinete do Primeiro-Ministro (GPM)