Dili, 10 Agostu 2021 – Populasaun hamutuk 1.600 resin iha aldeia Bee-Dois, suku Kamea, postu-administrativu Kristu-Rei, munisípiu Dili, halerik hela ba bee-moos dezde tinan 1999 wainhira Timor-Leste seidauk ukun-an to’o agora.
“Ami dezde 1999 ami bee-moos laiha to’o agora. […] Durante ne’e ami halerik hela de’it ba Governu maibé ida nunka atu tún mai halo buat ruma,” dehan Narsizu do Rego nu’udar komunidade ida iha aldeia Bee-Dois ba jornalista Timor News, iha tersa (10/8) ne’e iha aldeia refere.
Iha fatin hanesan, Xefe aldeia Bee-Dois Jose Pereira Cárceres de Carvalho mós akresenta problema ida ne’e, hodi dehan katak sira ba hasoru direita ona parte Governu nian maibé seidauk fó solusaun di’ak.
“Aldeia Bee-Dois ho totál populasaun 1.600 resin. […] Ami halerik ba bee-moos ne’e la’os foin tempu ita ukun-an ne’e. Ami halerik iha Indonézia nia tempu kedas. To’o ita ukun-an tiha mós ami kontinua halerik ba bee-moos ne’e to’o agora. Ami halo kontaktu beibeik (ba Governu), ami direita ba hasoru, ikus mai nia rezultadu mak hanesan ne’e,” dehan Xefe aldeia ne’e.
Nia husu ba Governu atu kanaliza bee ho di’ak ba sira-nia aldeia tanba komunidade sira ba kuru bee-moos to’o iha mota-ulun.
“Komunidade balu iha kbiit para bele sosa (bee) entaun nia sosa, tanke kareta nian ida $35. Ema ne’ebé mak kbiit laiha kuitadu tenke ba kuru to’o mota-ulun, buka bee para mate,” Jose akresenta.
Fonte: Timor News