Dili, 25 Marsu 2022 – Itália la konsege hakat ba kopa mundiál 2022 hafoin nasaun refere hetan derota iha play-off wainhira joga kontra Masedónia Norte ho rezultadu golu 0-1, iha estádiu Renzo Barbera, Palermo, Itália, ohin (25/3) madrugada otl. Enkuantu Portugál pasa ba final play-off kopa mundiál 2022 Path C zona Europeia hafoin halakon tiha Túrkia ho golu 3-1, ohin (25/3) madrugada otl iha estádiu Dragão, Portugál.

Jogadór ekipa nasionál Itália, Marco Verratti, konsidera Itália nia fallansu atu hakat ba kopa mundiál 2022 ne’e hanesan mehi aat ida. Itália nia derota ida ne’e susar tebes atu rekupera tanba golu ida ne’ebé Masedónia Norte marka ne’e iha kedas minutu 90’+2’.

Enkuantu Portugál nia golu tolu kontra Túrkia ne’e marka hosi jogadór portugeza Otavio Monteiro (15’), Diogo Jota (42’) no Matheus Nunes (90+4’). No Túkia nia golu ida ne’e marka hosi Burak Yilmaz (65’).

Ho rezultadu hirak ne’e, iha finál play-off path C, Portugál sei joga kontra Masedónia Norte iha kuarta (30/3) 05:45 otl, hodi determina sé mak atu tama ba kopa mundiál 2022.