Dili, 21 Dezembru 2021: Primeiru-Ministru, Taur Matan Ruak, deklara katak projetu boot ne’ebé posível atu lansa tán iha tinan 2022 mak rekonstrusaun ospitál boot foun tanba estudu ba Ospitál Nasionál Guido Valadares (sigla inglés HNGV) no ospitál Lahane finaliza ona.
“Estudu ne’ebé Ministériu Obras Públika ho Ministériu Saúde halo ba ita-nia Ospitál Nasionál Guido Valadores ho óspital Lahane ne’e hotu ona, espera katak iha tinan oin ita bele halo lansamentu ba óspital boot iha ita-nia nasaun,” dehan Primeiru-Ministru, ohin (21/12) iha munisípiu Aileu, iha okaziaun lansamentu no tau plaka ba futuru instalasaun sidade universitáriu.
Enkuantu iha segunda (20/12) liubá Ministru Obras Públika (MOP), Salvador Eugénio Soares dos Reis Pires, simu ona Maket ka Miniatura Planu Mestri ba konstrusaun foun HNGV hosi konsultór konsórsiu entre kompañia lokál no internasionál, MAFRA Consultante, servisu hamutuk ho HCM EXCELLENCE iha Timor-Leste no Indonézia.
Aléin hosi projetu ospitál boot, Primeiru-Ministru dehan katak sei bele lansa mós projetu konstrusaun Sentru Formasaun Exelénsia iha Metinaru ne’ebé ninia estudu oras ne’e la’o hela.
”Daudaun ne'e halo hela estudu ida ba projetu boot ida tán, ne’e bolu dehan Sentru Formasaun Exelénsia, ne’e formasaun téknika profisionál ba ita-nia oan sira aban bainrua, ke agora estudu la’o hela halo iha Metinaru. Sé buat hotu la’o di’ak, tinan oin ita halo lansamentu,” nia dehan.
Fonte: Mídia Gabinete do Primeiro-Ministro (GPM)