Dili, 14 Maiu 2021 – Prezidente Parlamentu Nasionál (PPN) Aniceto Guterres Lopes hato’o mensajen ohin (14/5) hodi husu ba povu tomak atu loke fuan ho ida-idak nia konsiénsia rasik hodi kumpri regra prevensaun Covid-19 tanba moras ne’e nia impaktu afeta tebes saúde públika, moris sosiál, ekonómika no funsionamentu órgaun Estadu nian.
“Ho ita-nia disiplina, kumpri regra ho konsiénsia, kooperasaun di’ak, pandemia Covid-19 remata iha ita-nia rain doben ida ne’e, ita-boot mós parte ida,” PPN akresenta liuhosi mensajen ne'ebé divulga ohin (14/5).
PPN konsidera katak maske kazu Covid-19 kontinua aumenta iha Timor-Leste maibé movimentu iha fatin públiku sei kontinua rame hela, ladún halo tuir regra prevensaun no mitigasaun Covid-19 no ida ne’e lori risku no kontribui ba hada’et Covid-19.
“Nu’udar PPN, ho laran tomak, ha’u husu nafatin ba sidadaun hotu-hotu, atu mantéin firme iha kumprimentu regra prevensaun no mitigasaun pandemia ne’e ho konsiénsia rasik iha ida-idak nia fatin, respeita no kolabora ho pesoál sira ne’ebé halo servisu prevensaun no mitigasaun,” dehan PPN.
Fonte: Media Parlamento Nacional