Dili, Prezidente Repúblika (PR) Francisco Guterres Lú Olo hato’o nia apresiasaun ba joven sira hosi grupu Konservasaun Flora Fauna (KFF) tanba uza sira-nia kreatividade hodi dezenvolve ai-parapa iha Hera, Dili, sai fatin turístiku ne’ebé atrai ona entidade oioin to’o oras ne’e inklui PR rasik ho nia família.
“Ha’u iha Dili rona de’it grupu joven, ne’ebé hola inisiativa hadi’a fatin ne’e hanesan tipu turizmu komunitáriu. Entaun presizamente iha tempu ida ne’e, ha’u mai ho ha’u-nia família rasik atu haree ho matan no apresia uitoan, saida mak ita-nia joven sira halo. Realmente ohin depois tama vizita fatin sira hotu, impresaun saida mak ha’u bele hatete iha ne’e? Ita-nia joven sira, iha sira-nia própria kapasidade, sira-nia espíritu kreativu ne’e iha, estudu kona-ba bee, ambiente sira halo para sai furak no sai di’ak teb-tebes,” dehan PR iha domingu (01/8) ne’e hafoin vizita tiha fatin turístiku ne’e iha Hera.
Xefe Estadu ne’e akresenta katak, nia sei ko’alia ho Governu atu oinsá mak bele insentiva di’ak liután fatin ne’e no sira seluk mós hodi atrai turista sira.
KFF hahú nia atividade hodi konserva no prezerva ai-parapa iha Hera dezde tinan 2014, ho voluntarizmu juventude sira nian, to’o ikus hetan apoiu hosi doadór Programa Dezenvolvementu Nasaun Unidu (sigla inglés UNDP) inklui hetan reseita hosi vizitante.
Fonte: Mídia Presidente da Repúblika (PR)