Dili, 09 Jullu 2021 – Prezidente Repúblika (PR) Francisco Guterres Lú Olo enkoraja atleta timoroan na’in-3 atu ba kompete iha Tokyo Olympic Games 2020 (2021) ho aten-barani no neon-metin hanesan bei’ala sira.
“Ita-boot sira sei reprezenta ita-nia rain doben Timor-Leste no sei kompete ho atleta sira seluk hosi rai oioin. Prezidente Repúblika enkoraja ita-boot sira atu haktuir ita-nia bei’ala sira. Katak sei kompete ho aten-barani no neon-metin! Ho forsa vontade maka’as, determinasaun no persisténsia. […] Karik ita-boot sira manán medulla ruma, sei fó onra boot liután ba Timor-Leste. Maibé tuir Pierre Coubertain hatete ’Importante liu la’os manán, maibé kompete ho dignidade’. Ha’u-nia votu susesu ba imi hotu,” dehan PR ohin (09/7) iha sorumutuk ho atleta na’in-3 hodi halo despedida tanba atu aranka ba Japaun iha loron hirak tuir mai.
Hosi atleta na’in-3 ne’e, atleta na’in-2 Imelda Belo ho José da Silva mak sei kompete iha modalidade Natasaun, no Felisberto de Deus sei kompete iha modalidade Atletizmu. Enkuantu Olympic Games ne’e sei realiza iha 23 Jullu to’o 08 Agostu 2021 iha Japaun.
Timor-Leste partisipa ona ba dahuluk iha Olympic Games ne’ebé realiza iha Austrália iha tinan 2000 no ba daruak iha Brazíl iha tinan 2016.
Fonte: Mídia Presidente da Repúblika (PR)