Dili, 23 Agostu 2023 - Prezidente Repúblika (PR) liuhosi Asesór Tékniku no Sekretáriu Ezekutivu Kaza Sívil, Agostinho Caet, hateten katak kompetisaun off-road (kompetisaun halai kareta ne'ebé la halai iha estrada nahe alkatraun, maibé halai iha tahu, raihenek, mota no seluseluk tan) internasionál ne’ebé sei realiza iha Tibar, iha loron rua to’o tolu fulan Setembru tinan 2023, hanesan inisiativa ida hosi Prezidente Repúblika hodi komemora loron konsulta populár 30 Agostu tinan ne'e, no atu promove pás no estabilidade iha rai laran inklui ho nasaun viziñu Indonézia no Austrália, ne'ebé sei partisipa mós iha eventu ida ne'e. Agustinho hato'o lia hirak ne'e hafoin enkontru ho ekipa hosi Golden River Universe, LDA, iha Kuarta (23/08) iha Palásiu Prezidente Aitarak-laran, Dili.  

Prezidente Repúblika parseria ho empreza Golden River Universe, LDA, hodi realiza eventu ne'e, no sei fahe ba kategória tolu: nasionál, internasionál no kategória ba feto. Tuir dadus klubu 10 hosi Indonézia no ida hosi Austrália mak rejista ona, enkuantu hosi kategoria feto, rejista ona partisipante hosi Indonézia hamutuk na’in-3 no na’in-4 hosi Timor-Leste.