Bobonaru, 14 Dezembru 2021 – Prezidente Repúblika (PR) Francisco Guterres Lú Olo, hala’o atividade kuda ai-kameli oan iha resintu Osuáriu Maliana, iha tersa (14/12) ne’e, apela ba sidadaun hotu katak, sidadaun ida kuda ai-oan ida hodi fó moris di’ak ba oan no bei-oan sira.

"Kuda ai-oan, tuir nafatin ha’u-nia moto ida ne’ebé hori uluk kedas fó sai ba povu tomak katak sidadaun ida, kuda ai-oan ida, ba moris di’ak ita-nian, moris di’ak ba ita-nia oan ho bei-oan sira atu bele hetan ambiente ida saudavel, ambiente ida ké di’ak ba aban bainrua nian. Ne’ebé mai kuda hela ai-oan iha fatin ida ne’e, simbolikamente atu bele hatudu vontade ida ne’e duni no mós atu hatudu duni ba maluk sira hotu iha postu-administrativu Maliana, Bobonaru tomak, atu hotu-hotu bele haree ba sidadaun ida-idak kuda ai-oan”, PR informa.

PR akresenta, asaun refere hanesan forma simbólika kampaña nasionál kuda ai-oan, ‘Sidadaun ida ai-oan ida', nu’udar parte hosi kompromisu polítiku hosi PR, hodi promove meiu ambiente no dezenvolvimentu ida sustentavel.

Enkuantu Diretór Servisu Agrikultura no Peska Bobonaru, Alberto Gomes Lopes apresia inisiativa PR nian no hatete katak ‘Sidadaun ida, ai-oan ida’ ajuda tebes Ministériu Agrikultura, liuliu Diresaun Servisu Floresta ninian oinsá mak bele atinji programa Governu kada tinan millaun ida ne’e.

Programa refere lansa iha inísiu 2019, hodi kuda ai-oan millaun ida, no to’o iha Novembru tinan ne’e kuda ona ai-oan hamutuk 915.575 iha teritóriu Timor-Leste.