Dili, 18 Novembru 2021 – Prezidente Repúblika Francisco Guterres Lú Olo, ho nia espoza Cidalia Nobre Guterres, ohin (18/11), hala’o vizita ba munisípiu Ainaru, ne’ebé simu hosi povu Ainaru iha Aiasa, postu-administrativu Hatu-udu.
“Ami ho haksolok hakat liu mai tuir dalan ne’ebé mak oan sira, inan-aman sira hamutuk ho autoridade fó hela dalan. Ne’ebé ami hakat liu daudauk uluk ona hodi soe ain tuir dalan ne’ebé mak ita-boot sira fó ba ami. Ne’ebé ami uluk ona ba uma no fatin. Aban sei tuir ba mak ita sei bele ko’alia di’ak tán. Obrigadu barak”, hateten Prezidente Lú Olo ba lia-na’in, autoridade munisipál no komunidade, hodi husu lisensa atu hakat liu ba Osuáriu munisípiu Ainaru hafoin simu tiha hosi komunidade.
Iha Osuáriu, Xefe Estadu hateten, “Timor-Leste iha parte ne’ebé-ne’ebé de’it, sempre halo parte istória Timor-Leste nian ba luta de libertasaun nasionál nian”.
Administradór Ainaru, Leovigildo Amaral Pereira hateten katak populasaun iha Ainaru kontente tanba Prezidente bele vizita sira-nia munisípiu.
Ko’alia kona-ba dezafiu saida mak nia no komunidade sira enfrenta no hakarak ko’alia ho Prezidente Repúblika, Administradór ne’e hateten, “hakarak aprezenta ba Sua Exelénsia Prezidente Repúblika dezafiu sira relasiona ho dezastre naturál iha 4 Abril, implementasaun estadu emerjénsia, Covid-19 no kampaña vasinasaun no mós situasaun komunidade hamutuk 152 ne’ebé mate iha fulan Setembru, iha munisípiu Ainaru, ho razaun ne’ebé la klaru”.
Enkuantu dezafiu hirak ne’e sei hato’o iha diálogu ne’ebé Prezidente sei halo ho komunidade sira iha loron aban (19/11) tuir ajenda.
Fonte: Mídia Presidente da Repúblika (PR)