Dili, 04 Novembru 2020 – Iha komemorasaun Loron Nasionál ba Feto Timor-Leste, Prezidente Repúblika Francisco Guterres Lú Olo liuhosi nia mensajen, fó parabéns ba feto sira, no apela mós ba ema hotu atu labele uza teknolojia foun hodi halo asédiu seksuál ba feto sira.
“ita presiza tebe-tebes uza teknolojia foun atu aprende buat di’ak, la’os halo asédiu seksuál, liuhosi ezibisaun pornográfika ba ita-nia inan no feton sira”, dehan Prezidente Repúblika iha mensajen ne’e.
Prezidente Repúblika mós husu ba komunidade sira atu hametin vijilánsia hodi proteje malu, nune'e, violénsia hasoru feto labele akontese iha ida-idak nia área hela-fatin.
“Loron 03 Novembru tenke sai loron espesiál ida atu halo refleksaun kle’an ba ita ida-idak nia hahalok no hanoin kona-ba feto sira. Balu ita-nia feton, balu ita-nia inan doben. Ita presiza sira iha ita-nia moris loro-loron, iha fatin hotu-hotu no ba ita-nia mehi hotu-hotu (...) Parabéns ba Feto Timor-Leste!”, Prezidente Repúblika hatutan tán.
Fonte: Mídia Presidente da Repúblika (PR)