Dili, 10 Juñu 2021 – Prezidente Repúblika Francisco Guterres Lú Olo lansa ona livru ho títulu ‘Buibere Hamriik Ukun Rasik-An’ ohin (10/) iha Palásiu Prezidensiál, Dili, ne’ebé sai nu’udar livru importante ida hodi sura istória luta barani feto sira nian iha pasadu.

“Ho laran ksolok tebes no orgullu boot mak ha’u lansa ohin obra importante ida, la’os de’it ba ita-nia feto aswa’in sira, maibé ba mós ita hotu-hoti, jerasaun ohin nian no aban-bainrua nian. Livru sura istória luta barani feto sira nian lansa iha Palásiu Prezidensiál Nicolau Lobato asosia ho data importante tebes ida iha ita-nia Luta Libertasaun Nasionál: Levantamentu Marabia, iha 10 Juñu 1980. [...] Istória sura iha livru ‘Buibere Hamriik Ukun Rasik-An’ haree ba pasadu ida ne’ebé nakonu ho barani, determinasaun no dedikasaun, maibé ho mós halerik oioin ne’ebé sei hakanek hela sobrevivente sira,” dehan Prezidente Repúblika iha nia diskursu.

Xefe Estadu ne’e akresenta katak livru refere prodúz ho inisiativa hosi Organizasaun Populár da Mulher Timor (OMPT), maibé reflete feto hotu-hotu nia kontribuisaun ba luta hahú hosi 1974 to’o 1999.

“Tanba ne’e, livru ‘Buibere Hamriik Ukun Rasik-An’ iha dimensaun nasionál, ho valór sosiál, polítiku, istóriku no edukasionál aas tebes ba jerasaun hotu-hotu,” Lú Olo dehan.