Dili, 25 Outubru 2021 – Prezidente Repúblika (PR) Francisco Guterres Lú Olo sei haruka pedidu ba Parlamentu Nasionál (PN) hodi fó autorizasaun ba nia atu bele kontinua dekreta Estadu Emerjénsia (EE) ba dala-19 ba loron tolunulu tán tuir pedidu hosi Governu.
Prezidente Repúblika deside atu haruka pedidu ba PN hafoin hetan tiha rekomendasaun hosi Konsellu Estadu (KE) no Konsellu Superiór Defeza no Seguransa (KSDS) wainhira hala’o reuniaun ohin (25/10) iha Palásiu Prezidensiál, Dili.
“Konsellu Superiór Defeza no Seguransa no Konsellu Estadu rekomenda ba Prezidente atu hato’o pedidu estensaun Estadu Emerjénsia ba iha Parlamentu Nasionál hodi hetan autorizasaun. Estensaun Estadu Emerjénsia nafatin. Nia medidas depende ba dezenvolvimentu ne’ebé mak iha,” Xefe Casa Civíl Francisco Maria de Vasconcelos hateten hafoin reuniaun refere remata.
Implementasaun EE ba dala-18 nian sei remata iha tuku 23:59, iha 29 Outubru 2021, enkuantu renovasaun EE ba dala-19 ba loron 30 tán sei hahú hosi tuku 00.00, loron 30 Outubru 2021, no termina iha tuku 23:59 iha 29 Novembru 2021.
Fonte: Mídia Presidente da Repúblika (PR)