Dili, 10 Juñu 2021 – Primeiru-Ministru Taur Matan Ruak hato’o apelu ba sidadaun hotu-hotu atu kontinua mantéin respeitu no kooperasaun di’ak ho Polísia Nasionál Timor-Leste (PNTL) nu’udar instituisaun Estadu nian.
“Buat ida ne’ebé ha’u hakarak apela ba komunidade tomak, povu tomak katak, ema ida mak sala ne’e, ema ida mak sala. [...]. Tanba ne’e, mantéin respeitu, mantéin kooperasaun di’ak ho instituisaun ita nian, tanba nia instituisaun ita nian. Hanesan mós ita-nia liman karik, liman-loos mak forsa armada, liman-karuk mak PNTL. Sira ne’e iha funsaun,” dehan Primeiru-Ministru ohin (10/6) hafoin hasoru tiha malu ho Prezidente Repúblika Francisco Guterres Lú Olo iha Palásiu Prezidensiál, Dili.
Xefe Governu ne’e mós husu ba PNTL atu kontinua hala’o knaar ho di’ak. “Maibé konserteza aktu hotu-hotu ne’ebé violentu ne’e ita hakribi”, Xefe Governu akresenta.
Fonte: Mídia Gabinete do Primeiro-Ministro (GPM)