RAEOA, 23 Outubru 2021 – Autoridade RAEOA sei harii kapela iha aldeia Noe Ninen, suku Cunha, Pante-Makassar, RAEOA, iha tempu badak nia laran.
“Autoridade RAEOA sei harii kapela ho moru hale’u iha tempu badak iha fatin ne'e […]. Intensaun Autoridade RAEOA sei estabele kapela refere hodi dignifika fatin istóriku no sagrada ne’e atu nune'e ita bele hetan matak-malirin ka bensaun no sempre hetan akompañamentu ba ita hosi bei-ala nu’udar kultura ne'ebé iha nanis kedas, promove iha loron ohin no sai fatin turístika iha futuru Oekusi ne'ebé buras liu,” haktuir divulgasaun ofisiál hosi parte Autoridade RAEOA, ohin (23/10).
Oras ne’e daudauk komunidade atus-rua resin iha aldeia Noe Ninen hala’o hela servisu hamoos rate no kapela antigu Nunu-Henu tanba hetan impaktu hosi siklone seroja iha 04 Abril liubá, hodi prepara ba loron matebian ne’ebé besik ona.
Iha preparasaun ne’e komunidade sira hetan mós apoiu karosa 8 no máskara hosi Autoridade RAEOA atu uza hodi hala’o servisu ho lalais liután.
Fonte: ZEESM Timor-Leste