Dili, 19 Fevereiru 2025 - Prezidente repúblika, José Ramos-Horta, destaka Timor-Leste nia progresu sira durante ne'e ba reprezentante diplomátiku sira, iha ninia diskursu serimónia resesaun diplomátika 2025, iha Palásiu Prezidensiál Nicolau Lobato, Dili.

Ramos-Horta hateten katak Timor-Leste nu’udar nasaun demokrátiku liu iha Ázia ne’ebé hetan klasifikasaun 10.º iha nível mundiál iha liberdade imprensa no relata mós nasaun-nia susesu hodi sai membru Organizasaun Mundiál Komérsiu nian iha tinan 2024.

Ramos-Horta destaka mós progresu dezenvolvimentu notável sira seluk, inklui aumentu ba númeru profisionál saúde sira hosi médiku na'in-21 iha 2002 ba besik 1,300 to'o ohin loron, no kreximentu hosi ensinu superiór ho universidade 17 ne'ebé agora konsege akumula estudante sira maizumenus to'o 60,000. Nia subliña mós responsabilidade fiskál nasaun nian ho proporsaun dívida ba PIB 16% no investimentu infraestrutura signifikativu sira, hanesan dezenvolvimentu iha setór enerjia ho dolár millaun 400 ne'ebé atinje tiha ona besik 100% hosi teritóriu nasionál.

Eventu importante ida seluk mak Papa Francisco nia vizita mai Timor-Leste iha 2024, ne’ebé Ramos-Horta konsidera nu’udar transformadora ba nasaun, reflete nasaun-nia kapasidade organizasionál hodi hametin nia pozisaun internasionál, no reforsa preparasaun hodi sai membru ba ASEAN iha tinan 2025.

Serimónia resesaun konklui ho espozisaun textil no pintura Tais ne’ebé hetan rekoñesimentu hosi UNESCO no vizita ba Lauhata iha Munisípiu Likisá, hodi promove produtu lokál no fatin turístiku sira ba komunidade internasionál.