Dili, 22 Jullu 2021 – Eiz Prezidente Repúblika Timor-Leste José Ramos-Horta sujere ba Governu atu prepara vasina kontra Covid-19 ba doze datoluk nu’udar faze ‘Booster’ hodi aplika iha tinan 2022.
“AstraZeneca no Pfizer efikáz kontra Covid (Covid-19 variante) Delta, maibé ha’u-nia hanoin di’ak liu Governu buka stock ‘Booster’ (doze tolu), para hahú aplika iha 2022,” dehan Horta iha nia divulgasaun ofisiál ohin (22/7).
Nia akresenta katak pandemia Covid-19 bele aumenta maka’as iha tinan 2022 wainhira Governu la garante estoke vasina kontra Covid-19 doze datoluk nian.
“Laiha vasina ke fó protesaun 100% no vasina nia efikasia komesa tún iha fulan 9-12 liu tiha ka menus tán. Sé Governu la garante ona importasaun vasina ‘booster’ pandemia bele maka’as iha 2022,” Horta dehan.
Fonte: Pájina Ofisiál José Ramos-Horta