Dili, 16 Agostu 2021 – Reitór Universidade Nasionál Timor Lorosa’e (UNTL) João Soares Martins hateten katak, estudante ativu sira ne’ebé la hetan subsídiu pulsa ba aula online ne’e dalaruma tanba estudante sira troka tiha ona sira-nia númeru telefone ka sira-nia númeru telefone la loos.
“Ida ne’e tanba (subsídiu) pulsa ne’e Governu fó direitamente tuir númeru (telefone) ne’ebé mak sira hato’o ba. Sé kestaun balu la simu ne’e parese númeru mak la loos ka sira troka númeru karik ita la hatene,” dehan Reitór ba jornalista Timor News, ohin (16/8) iha nia knaar-fatin kampus UNTL sentrál, Dili.
Nia rekomenda ba estudante ne’ebé seidauk hetan subsídiu pulsa atu bele hato’o reklamasaun ba Governu hodi rezolve wainhira sira-nia númeru telefone ne’e loos hela maibé pulsa la tama.
“Ajuda pulsa ne’e la liuhosi universidade. Governu hatama direitamente ba númeru telefone ne’ebé mak submete ba. Sira bele hato’o claim ba Governu liuliu ba Ministériu Ensinu Superiór, dezde ke sira fornese númeru ne’ebé loos no pulsa la tama. Pois servisu kompañia ne’ebé oferese ida ne’e sei buka tuir,” dehan Reitór.
Nia akresenta katak sé estudante sira fó númeru telefone seluk no uza fali númeru telefone seluk entaun la’os problema Governu nian.
Molok ne’e iha estudante balu mak hato’o ona sira-nia lamentasaun ba Timor News katak sira seidauk hetan subsídiu pulsa ne’ebé Governu fahe hodi uza ba aula online.
Fonte: Timor News