Dili, 21 Setembru 2021 – Reitór Universidade Nasionál Timor Lorosa’e (UNTL) João Soares Martins husu ba Graduadu hamutuk na’in-349 ne’ebé ohin tuir serimónia Graduasaun ba dala XXIV ne’e katak tenke uza matenek ne’ebé sira hetan ho responsabilidade hodi servi komunidade no nasaun.
“Ohin ofisialmente universidade husik ona imi hodi fila ba serví komunidade no nasaun tuir matenek no kompeténsia akadémiku hosi área oioin ne’ebé universidade oferta, tanba ne’e, ha’u tatoli ba imi atu uza matenek ne’e ho responsabilidade, hodi aplika no buka aprende liután ba ida-idak nia futuru,” dehan Reitór UNTL, ohin (21/9), iha serimónia Graduasaun ba dala XXIV ne’ebé hala’o ba Graduadu na’in-349 iha Auditóriu UNTL nia Fakuldade Enjeñaria, Siénsia no Teknolojia (FEST), Hera, Dili.
Reitór mós agradese ba inan-aman sira tanba la kole atu suporta sira-nia oan to’o finaliza estudu.
Iha fatin hanesan, reprezentante Graduadu Moises Soares Magno, hato’o mós agradesimentu ba sívita akadémika tomak, inan-aman no enkaregadu sira ne’ebé fó ona apoiu direita no indireita ba sira hodi atinje susesu.
Fonte: Mídia Universidade Nacional Timor Lorosa'e (UNTL)