Dili, 19 Outubru 2021 – Prezidente Konsellu Kombatente Libertasaun Nasionál (KKLN) Vidal de Jesus ‘Riak Leman’ hateten katak mosu veteranu falsu barak tanba veteranu sira koñese ka hatene hela ema nia pasadu maibé nonook de’it no la reklama kedas iha momentu prosesu verifikasaun la’o hela.
“Buat ida aprova dadus, halo verifikasaun no aprova ne’e iha veteranu hotu-hotu nia oin, kaixa mós iha ne’ebá, responsável sira, sira ne’ebé túr iha estrutura, Sekretáriu Zona, seluk tán iha hotu iha ne’ebá ne’e mak hodi aprova. Agora ita veteranu iha Timór ita-nia lisan aat ida mak ne’e, kuandu aprova iha ne’ebá nia haree ema ne’e la partisipa (iha luta) ka ema ne’e milísia ka traidór ida ne’e (veteranu) sira la reklama. Kuandu aprova liu tiha mak sira foin dehan oh ema ne’e hanesan ne’e hanesan ne’ebá, ne’e problema ida. Nusá mak iha oin ne’ebá sira la aprezenta? Ne’e akontese beibeik ona […] Kuandu verifikasaun dadus la’o hela ema bara-barak iha ne’ebá sira lakohi reklama katak ema ne’e hanesan ne’e hanesan ne’ebá. Aprova liu tiha mak sira foin dehan. Maibé iha oin ne’ebá ida la ko’alia. […] Nia hatene hela maibé nia la dehan,” Riak Leman informa ba jornalista Timor News, ohin (19/10), iha nia knaar-fatin, Dili.
Prezidente KKLN ne’e hateten katak presiza halo investigasaun kle’an no ho loloos ba veteranu sira-nia kontribuisaun.
“Lalika bosok lalika inventa,” nia akresenta.
Riak Leman hateten katak veteranu falsu hirak ne’ebé identifika ona ne’e sei entrega hikas osan ne’ebé sira simu tiha ona ba Estadu ka hatama sira ba kadeia, maibé prosesu hotu-hotu sei liuhosi Tribunál.
“Tribunál mak sei deside,” Riak Leman realsa.
Fonte: Timor News