Dili, 10 Novembru – Koordenadór Saúde Ba Ema Hotu (SABEH), Andre Belo, informa iha tersa (09/11) ne’e iha Palásiu Prezidensiál, Dili, katak, iha eventu realizasaun konsulta médika iha resintu Palásiu Prezidensiál, SABEH rejista pasiente ho problema fuan no pulmaun ka kardiurespiratóriu aas liu.
Moras seluk ne’ebé rejista mak hanesan tensaun aas, estomagu no moras-kulit.
Hatán ba prosesu tratamentu ba pasiente sira ne’e, Andre Belo hateten, “tratamentu la’o di’ak. Komunidade no staff sira mós kontente tanba doutór sira haree no esplika ho di’ak kona-ba sira-nia moras”.
Atividade konsulta médika ne’e Prezidénsia Repúblika realiza durante loron rua, hahú hosi 08 to’o 09 Novembru 2021, nu’udar parte ida hosi programa ‘Palásiu Aberta’, ne’ebé koopera ho SABEH.
Fonte: Mídia Presidente da Repúblika (PR)